brauhaus winterthur

Chnelle #19: Brauhaus Winterthur

S’einzige Brauhaus in Winti isch nonig alt, es isch erscht grad im April 2014 im Neumärt eröffnet worde. So gsehts dänn au vo ine schön und (no) neu us. Die offe Chuchi fallt sofort is Aug, überall brutzled irgendöppis. Das schmöckt mer dänn natürlich au, wobii mer euis no sälte über än feine Speck-Gruch beklagt händ. Standesgemäss chan mer us enere Vielzahl Bier uswähle, inklusive Saison-Specials wie äm Schneeflöckli-, em Osterhäsli- oder em Summerfest-Bier.

D’Spiescharte bütet ordentlich Uswahl, viel meh aber au nöd. Das wo’s druff hät chan mer wegem ehner spärliche Liecht – wo sich uf dä Plastikkarte zudem spieglet – chuum lese. Mir händ euis dänn alli ä Taschelampe-App zur Hilf gno.

Zur Vorspies häts Flammchueche gä, eimal mit Lachs, eimal mit Speck, zweimal leider zimli troche (wie tendenziell chli alles – mer will ja de Bierkonsum höch halte). Aber gross Ziit zum Flüssigkeit ufnäh isch gar nid blibe: Nonig mal die ganz Vorspies gesse, isch nämli scho dä Hauptgang da gstande. Dä (lauwarm) Burger im Bagle,  mit Fritte und verschiedene Salöt isch rundume fein gsi. Genau so s’Cordon Bleu und d Spätzli. Mit dä Portione reuts es definitiv nöd (nid mal meh Platz für Dessert gha), was bi de doch eher höche Prise aber au fast frech wär.

Übrigens, nehmed eui vor äm Brot-Chörbli uf äm Tisch in acht. Isch nämli gar kei Brot drin, sondern Bagles, und dä isch dänn nöd öppe gratis, sondern chostet extra. Schlaui Füx die im Brauhaus.

Brauhaus Winterthur
Neumarkt 9, Winterthur
Tel. 052 202 86 86
www.brauhaus.ch
GD Star Rating
loading...
Chnelle #19: Brauhaus Winterthur, 2.4 out of 5 based on 5 ratings

Schreibe einen Kommentar

Or