restaurant rhodos

Chnelle #20: Restaurant Rhodos

So uf halbem Weg zwüsched Wülflinge und dä Stadt findet mer eine vo dä wenige Grieche in Winterthur, s’Restaurant Rhodos. Au wänns a dä Hauptstrass liit und parkiere ehner nöd grad eifach isch, chuum betritt mer s’Lokal fühlt mer sich zmitzt in Griecheland (oder im Europapark). Vom typisch griechische Gastgeber, über dä ganzi Irichtigs-Stil bis hin zur Musig, alles erinneret chli a die Summerferie wo mer doch mal uf Kos, Kreta, Zakynthos oder ebe, Rhodos, verbracht hät. Dä üppig bemesseni Ouzo – wo eigentli grad sofort uf äm Tisch staht – treit sin Teil dezue bi, dass d Stimmig inere Gruppe Nullkommaplötzlich heiter bis grandios isch…

Natürlich gahts dänn bi dä Charte witer. Dete häts Näme druff, die chönted länger und unussprechlicher wohl gar nöd si. Euises chalte Vorspiese-Plättli hät dänn au viel vo dene beinhaltet. Zu Pittas häts nämli diverse feini Dips, Paste, Söseli & Co gä. Vo dene häts euis vor allem Tyrokafteri sehr a tah. Muen mer mal gha ha. Genau so wie übrigens Keftedakia, das sind extremscht gueti Rindshacktätschli. Taramosalata isch defür nid so eusen Fall gsi – zu fischig im Abgang.

Die Vorspiese hämmer dänn mal chli setze la. Dadäfür hämmer au gnueg Ziit übercho, fascht ä chli gar viel Ziit. Fascht scho vergesse dass mer ja mal Hunger gha hät bis es dänn witer gange isch. Als Hauptgang händ sich fascht alli vo euis für Lamm entschiede. Die einte als Kleftiko (Lamm in Folie mit Feta, Härdöpfel, Chnobli und Gmües), die andere als Exochiko Arnaki (Lamm im Blätterteig mit Erbse, Rübeli, Härdöpfel). Es git natürlich au anders, so z.B. es Gemisto Kotopoulo. Wobii das glaub eifach griechisch für Poulet-Cordonbleu isch. Guet Chnobli häts aber uf jede Fall i allem drin, dementsprechend deftig schmöckt au alles.

Abgrundet wird dä Abig dur än feine Dessert (Blätterteig mit Süess), wo sogar no ufs Huus gaht.

Restaurant Rhodos
Wülflingerstrasse 134, Winterthur
Tel. 052 222 17 82
www.restaurant-rhodos.ch
GD Star Rating
loading...
Chnelle #20: Restaurant Rhodos, 3.4 out of 5 based on 5 ratings

Schreibe einen Kommentar

Or