la-bodega-carlo

Chnelle #24: La Bodega Carlo

Grad bi dä Linas Bar um dä Egge findet mer La Bodega Carlo. Also finde tuet mers vor allem weg äm grosse Appezeller-Bier-Schild dusse, suscht ischs nämli relativ guet mit Grüen ideckt rundume.

D’Spiescharte isch starch italienisch und spanisch aghuucht. Das heisst also es git nebed jegliche Scaloppine-Variatione und Paste selbstverständlich au Paella zur Uswahl. Natürlich mues aber zerscht mal än zünftige Vorspiese-Mix ane: Chorizo, Rohschinke, Gambas vom Grill oder i de grandiose Knobli Sauce sowie knusprig frittierti Calamares. De Uftakt glingt mit dere Wahl wunderbar! De Carlo verstaht offesichtlich sis Handwerk i de Kuchi. Leider hät de gueti Maa aber bitz knapp Herdplatte und drum wirds mängisch chli tricky für ihn, und bitz es Geduldsspiel für d Gäst. d Frau im Service bhaltet eim aber mit flüssigem bi Luune und mag au mal en Spruch verliide. Kei Selbstverständlichkeit.

S warte hät sich dänn au für de Hauptgang glohnt. D Paella isch optisch en Knüller und de Gaume hät ebefalls de Plausch. Wie d Paella wird au de spanischi Kolleg vom heimische Mistkratzerli i 2 Runde serviert und baded i de multifunktional isetzbare Knobli-Sauce, wo mer bereits vo de Vorspies kenned. d’Scaloppine sind ebefalls ohni meckere verdruckt worde, egal ob mit Fritte oder Nüdeli.

Abgseh vom Esse isch d Bodega im Innere sicherlich kein Augeschmaus. Sehr rutikal und altbacke laded s Lokal nid unbedingt zum lang verwiile i. De Garte profitiert jedoch vo viel Grün und grossgwachsne Bäum. Wer d Wahl hät dem isch also en Bseuch bi guetem Wetter as Herz gleit. Fürs Esse lohnt sichs alleweil.

Tellstrasse 15, Winterthur
Tel. 052 222 96 72
www.labodegacarlo.ch

GD Star Rating
loading...
Chnelle #24: La Bodega Carlo, 4.0 out of 5 based on 5 ratings

Schreibe einen Kommentar

Or