outback lodge

Chnelle #25: Outback Lodge

„Feel the real australian way of life“ – so prist sich d Outback Lounge gern selber a. Grossi Wort. Aber das isch irgendwie au grad es bitzeli typisch. Gross! Gross wie s Lokal an sich, mit Tisch uf zwei Ebene im Innere und Usse sowohl links wie au rechts vom Gebäude. Gross au wie d Uswahl uf de Karte. Die umfasst nämlich allerlei skurils wie Emu, Zebra, Krokodil, de Monster-Truck-Burger mit allem drin was d Kuchi hergit, aber au chlini Mezze-Häppli zum istiege. Erstuunlicherwis sind die „Experiment“ au no alli glunge. Selbst die an sich banale Country Cuts – da Downunder Fries gnannt – sind grosses Fritte-Kino. Am Tisch hät sich bald rundherum es zfriednigs Grinse usbreitet. Ganz unschuldig a dem Grinse isch natürlich au d riese Uswahl a Hochprozentigem nid, aber das isch ja Wurst. Die chunt übrigens vom Kanguru und isch ebefalls wunderbar als Vorspies.

Wer s Lokal nid kennt oder scho lang nüme gsi isch de dörfti erfreut si z ghöre, dass mer 2012 einiges erneueret hät. De Stil isch no de glichi. Chli Pub-Atmosphäre in semi-edel, aber es isch dütlich früscher und nüme so abegrockt. Mer rühmt sich sogar mit de schönste WCs vo Winterthur, und das isch denn au tatsächlich gar nid sooo wit hergholt.

Und wo isch s Haar i de Suppe? So richtig händ mer keis gfunde. Viellicht het s Zebra bitz meh dörfe dure si, aber wer weiss das bi Zebra scho so genau. Oder s Brot bi de Vorspiese-Mezzes bitz fluffiger. Aber hey, mit de bekannt gelassene Australische Lebensistellig sind so Sache maximal Peanuts.

Outback Lodge, Lagerplatz 4, Winterthur
Tel. 052 214 00 26
www.outback-lodge.ch

GD Star Rating
loading...
Chnelle #25: Outback Lodge, 4.2 out of 5 based on 6 ratings

Schreibe einen Kommentar

Or