tandoor

Chnelle #29: Tandoor Restaurant

Stadtuswärts richtig Wülflinge findet mer uf dä rechte Strassesiite s’Indische Restaurant Tandoor, und dete gits alles für de «Tandoori-Gluscht» (staht au so im Menü).

Zur Vorspies händ mir euis Milla Julla bstellt, das isch än Mix us verschiedene Sache: Samosa, Methi Chamen Kebap und Chili Popper. Fein sind zwar alli, aber so für 5 Persone sind 3 Milla Jullas doch dütlich z wenig gsi. Da hät dä Maa glaub euises „es Plättli mit chli vo allem für 5 Persone“ nöd ganz richtig verstande gha.

Als Hauptgäng händ mir Murg Tikka (Poulet us äm Tandoor), Tandoori Sangam (verschiedeni Fleisch us äm Tandoor) und selbschtverständlich es Curry (Gosht Lababdar, es Lammcurry us Nordindie) bstellt. Dezue Riis und Butter-Fladebrot (Laccha Parantha – seeehr empfehlenswert). A dä feine und grosse Portione händ alli sehr de Plausch gha. Au optisch mached d Hauptspiese einiges her, chömed sie doch schön agrichtet, wild zischend und heiss brutzlend an Tisch.

Mit äm positive Idruck vo dä sehr guete Hauptspiese händ mir euis dänn as Dessert gwagt. Das hettemer lieber sii la. Dä Mud Pie und au s’Mango Kulfi isch zwar gar nöd sooo schlecht gsi, aber agrichtet isch es halt scho au chli gar lieblos gsi. Und vom Tandoor Spezial chömer mit guetem Gwüsse abrate. Das isch ä huusgmachti Banane-Vanille-„Crème“ wo so flüssig isch, dass mir sind go Röhrli hole zum sie chöne trinke. Mir händ aso nahgfröget, dä Maa hät gmeint die müesi so si. Äh ja, mag so gewollt si, göcht aber ehner als dünnflüssige Milchshake dure und ganz sicher nöd als Crème.

Au wänn dä Desser chli unrühmliche Abschluss gsi isch, allei die feine Hauptgäng wäred also sicher wieder mal än Bsuech wert.

Schützenstrasse 43, Winterthur
Tel. 052 222 85 76
www.restaurant-tandoor.ch

GD Star Rating
loading...
Chnelle #29: Tandoor Restaurant, 3.4 out of 5 based on 5 ratings

Schreibe einen Kommentar

Or