restaurant bruderhaus

Chnelle #35: Restaurant Bruderhaus

Wer kennts nöd, s’guete alti Bruederhuus i dä nöchi vom Eschebergturm. Das isch dete, wo mir als Chind alli stundelang dur än Haag dureglueget händ wills uf dä andere Siite Wölf und Lüchs söll ha. Meistens (also nei, eigentli immer) hät mer dänn eifach chli in Wald iäglueget, vo Wölf und Lüchs wiit und breit kei Spur (aber es hät im Fall würkli dete, glaub). Uf jede Fall häts nebed (kei) Wölf det obe au es Restaurant. Und das chan definitiv me als s’übliche Glacé nach äm Tierli aluege am Sunntignamitag.

S’Motto vo euisem Abig isch „Wild esse“ gsi. S’Restaurant selber chönt dänn für das au passender nöd si. Mer fühlt sich chli wie inere Jägerstube. Gmüetlich, nett, dä Service au mal chli forsch aber immer fründlich 🙂

Nach ämä feine Bruederhuus-Teller (mit Speck, Schinke, Chääs, usw.) zur Vorspiis, hämmer euis dänn as Wild gwagt: Wildpfeffer Jägerart (Fleisch bi euisem Bsuech isch vo dä Wildsau gsi) und Rehschnitzel. Beides isch natürlich mit Spätzli und Rotchruut und Maroni cho. Alli Portione sind eher gross gsi, aber vor allem: Sehr fein! Au dä huusgmachti Hackbrate mit Härdöpfelstock chömmer absolut empfehle!

Abgrundet hät dä Abig dänn es Vermicelles und än Öpfelstrudel mit Vanillesauce. Au da isch wieder beides sehr sehr guet gsi.

Gmüetlich, fein, fründlich und Priis/Leistigsverhältnis stimmt – alles i allem also definitiv än Ort, wo mer me sött hi ga go Znachtesse.

Restaurant Bruderhaus
Bruderhausstrasse 1, Winterthur
Tel. 052 232 75 13
www.restaurant-bruderhaus.ch

GD Star Rating
loading...
Chnelle #35: Restaurant Bruderhaus, 4.8 out of 5 based on 4 ratings

Schreibe einen Kommentar

Or