strickers

Chnelle #38: Stricker’s

Im ehemalige Cheers, d.h. also grad hinder äm Neuwiese, gits sit äm Summer 2016 neu s’Restaurant Stricker’s. Neu isch dänn au viel vom Interieur, da würkt die Lokalität dänn scho grad es guets Spürli schöner und ufgrumter als no früehner.

Uf dä Charte häts mit Sicherheit für jede Gschmack öppis – egal obs jetzt öppis Fleischigs (Tomahawk-Steak, Burger, Kalbsläberli, etc.) oder Vegetarischs (Polenta Spätzli, Kürbisragout, Spaghettini, usw.). Isch mer sich unschlüssig, dänn nimmt mer am beschte ä Stricker’s Platte, dete häts nämli dänn vo (fascht) allem es bizli druff. Das händ au mir gmacht.

Agfange wird dänn mit verschiedene, feine Crèmes zur Vorspies (v.a. d’Walnusscrème isch super!), zämä mit huusgmachtem Brot. Als Hauptspies gits, wie erwähnt, ä Uswahl us verschiedene Gricht. Bsunders guet händ euis die Gschmorti Rindsroulade und s’Kalbs-Gulasch gfalle. Aber au alles anderi (z.B. Crevette im Mango-Orangensud oder Spaghettini mit Walnuss-Pesto) isch würkli fein gsi.

Wänns uf dä Dessert-Charte ä „Geschmacksexplosion“ hät, dänn muen mer die ja eigentlich zwingend nä. Hämmer gmacht und händs nöd bereut; Passionsfruchtespuma, wisses Schoggimousse, Röteli Glace und Snickers – alles i eim Glas, än Traum.

Isch ä gueti Sach s’Stricker’s, da passt würkli alles. Bis uf d’Musig wo im ganze Resti lauft villicht, die würkt irgendwie chli fehl am Platz – bizli öppis gmüetlichers wür sicher me passe. Aber ja, villicht werdemer au eifach langsam alt… 🙂

Stricker’s Restaurant
Strickerstrasse 8, Winti
restaurant-strickers.ch/

GD Star Rating
loading...
Chnelle #38: Stricker's, 4.3 out of 5 based on 6 ratings

Schreibe einen Kommentar

Or