giardino

Chnelle #42: Al Giardino

Bim Al Giardino isch de Name Programm! Im liechtdurchfluetete Restaurant häts allerlei Grünpflanze wo eim es bitz wie imne Garte lönd fühle. Edel deckt und schön belüchtet bütet s Giardino denn au e sehr gediegeni Atmosphäre zum esse, trinke und sich wohl fühle, ohni debi stiff z werde. Zudem chan s Giardino mit emne Innehof trumpfe, wo mer umrahmt vo altem Gemüür und überdacht vomne grosse Baum es tolls Schatteplätzli zum de Summer gnüsse findet.

D Karte isch übersichtlich und wies de Name erwarte laht Italienisch prägt. Pasta- und Fischgricht steched is Aug, und mit viel Vorfreud händ mir eus alli uf Vitello Tonnato, Insalata Caprese oder än Blattsalat mit Pilz und Birre gstürzt. Dass mir 2x händ müsse Sauce fürs Vitello Tonnato nabstelle werted mer jetzt eifach mal als Kompliment an Koch für die fein Sauce und weniger als Kritik a de Idee d Sauce separat imne viiiiel z chline Schäleli z serviere. Zur Hauptspies händ mir alli uf de Klassiker «Tagliatelle al Giardino» zrugg griffe, wo hüt leider nüme allzu viel mit sinere Originalversion «Spaghetti al Giardino» z tue hät, aber trotzdem lecker gsi isch. S selbstverständlich huusgmachte Tiramisu zum Dessert isch a Luftigkeit fast nid z überbüte gsi und rundet de Abig perfekt ab.

Au wenn s Giardino e bewegti Zit mit einige Bsitzerwechsel hinter sich hät isch es nach wie vor e Spitzeadresse in Winti für es tolls Esse.

Ristorante Al Giardino, Tösstalstrasse 70, Winterthur
http://algiardino.ch/

GD Star Rating
loading...
Chnelle #42: Al Giardino, 4.3 out of 5 based on 6 ratings

Schreibe einen Kommentar

Or