Schlagwort-Archiv: Tschechisch

schäfli

Chnelle #16: Restaurant Schäfli

S’Schäfli ghört zwar scho zu dä Klassiker,  aber das hät euis glich nöd dra ghinderet mal wieder iä z’luege. Ob tschechischi Spezialitäte oder Wild us äm schwiizer Wald, dä Begriff „währschaft“ trifft wohl uf alli Menüs im Schäfli zue. Agfange wird mit ämä sehr feine Ukrainischi Borschtsch. Det häts dänn so viel Zügs drin dass mer eigentlich scho fascht gnueg hät. Was aber nid heisst dass mer nachher die fein (aber chli mager) Prager Ente mit Knödel und allne Arte Chruut wo’s git nachher stah laht.  Wer wild mag, dä fahrt mit Reh, Hirsch oder Wildschwein guet, oder entscheidet sich grad für d Mix-Grill Variante. Die klassische Wild-Bilage hät mer a anderne Ort aber au scho besser und schöner agrichtet gesse.

Ob’s dänn zum Dessert würkli Piwidl Knedlik (viel Butter, wenig Gschmack) si mues, da drüber laht sich au striite. Mit ämä Palatschinken oder ämänä stinknormale Vanille-Caramel-Glace fahrt mer vermuetli besser. So oder so, än Becherovka oder Sliwowitz am Schluss mues sowieso si.

Alles i allem en guete Lade mit herzlicher und warmer Atmosphäre und spannender Spieskarte.

Restaurant Schäfli
Oberer Graben 18, Winterthur
Tel. 052 213 84 13
www.restaurant-schaefli-winterthur.ch